غايحاولو يزوقوك هاد ليام، غايحاولو يبينوك أجمل ما فالكون، غادي يسوقو ليك بلي نتي أجمل مدينة فالصحرا وأجمل ما فالمغرب. غايخسرو عليك فلوس صحيحة وكتيرة باش يردوك بحال شي عروسة، باش يبينو للمغاربة بلي نتي ما خاصك تا خير وبلي نتي مدينة مغربية، وانتي مدينة لي المغرب عازلها كيفما كيتعزل الزيت فوق الما ومتبرّي منها.
غايجيبو ليك بزاف ديال الضياف لي ما عارفينكش على حقيقتك، لي غادي يصوروك بحال ديك العروسة لي فوق العمارية، كلشي هاز تليفونو كيصور فالعروسة فأجمل خلقة وأجمل وحدة فالقاعة، حيث كالسين غير فالصالون وما دخلوش لقاع الدار يشوفو ولادك شنو مفروشين. باش معشين و شنو لابسين
حنا ولادك لي عارفينك باش مسگية، وعارفين شنو مورا الخامية، والضياف حدّهم الصالة وغايمشيو، وحنا ولادك لي ملي كنمشيو ناكلو من الحلوة لي خلاو الضياف فالصالة كتسلخينا وتخبيها لضياف أخرين وهكا دواليك، وحنا لي ولادك كتعطينا المرقة البايتة وتسدي علينا البيت باش ما نخرجوش نشوهوك مع الضياف.
وحدين من ولادك غايهزو تليفوناتهم يصوروك ويعيشو معاك أجمل 3 أيام فحياتهم كدوز من عام لعام، حيث عمرهم شافوك نقية وزوينة بحال هكا. وحدين من ولادك عارفينك شنو مخبية مورا داك الزواق وديك اللبسة البيضة لي لبستي فهاد ليام. وحدين من ولادك غايطبّعو ويرضاو بالوضعية ويديرو يديهم ويلحسو الطباسل من ديك الشياطة لي شاطت من الضياف وغايصفقو ليك ويزغرتو حيث والفو يلحسو الطباسل ومرة مرة كيمدو يديهم للضياف باش يدبرو عليهم. وحدين من ولادك عازّينها ونفسهم حارة وسادّين عليهم، لي ما راضينش يشوفو أمهم فديك الحالة وما كيرضاوش يحرزوك حيث هزيتي نيفك عليهم سنين هادي وكتقمعيهم كل مرة بغاو ليك الخير وبغاو يشوفوك ديما عروسة طول العام وماشي غير 3 أيام فيه، داكشي علاش أغلبيتهم خواو ليك الدار وخلاوها ليك، مرة مرة كيجيو يطلو على أمهم ويصلو صلة الرحم معاك ومع خوتهم ويرجعو بحالهم، وخا عذبتيهم وخا عزيتي فيهم رزقك وسديتي الباب فوجههم وما فتحتيش ليهم كيفما فتحتيه للبراني، عمرهم ما سمحوا فيك.
وداك الماكياج لي غايتمسح فأول تحدي ليك، وغاتريب عليك الدار، وغايمشيو الضياف وغايطفا عليك الضو وغاتخلصي دكشي لي خسرتي على الضياف ومخسرتيهشً على ولادك وبناتك ، الكريديات لي خلصتي فهاد العرس لي كبير عليك، وغايبقاو معاك غا وليداتك لي كيلحسو فطباسل ديال الضياف، كيتسناو فوقاش تزها عندك القضية عوثاني، ولادك لي مولفين يلحسو طباسل ما يقدروش يخرجو يقلبو على راسهم حيث والفو يلحسو الطباسل ويمدو يديهم، صعيب يخرجو من حداك. ولي بقي معاك غير مزال مجاتو الفرصة يهرب منك ، حيت تا هو غايتبع خوتو ، لي مشاو قبل منو
ولادك فاش كيمرضو كتصيفطيهم يتعالجو عند الجيران، وعمرك ما داويتيهم، فاش كيبغيو يخدمو كتشكي عليهم بلي ما عندكش فلوس، فاش كيبغيو يخرجو يتنفسو ويدورو ويبدلو الجو ما عندهم فين تخرجيهم حيث أصلا الدار كلها ظلام وزبل وممفرشاهاش فراش زوين، كتفرشيها غير من العام لعام ، صمكتيها عليهم وهما ما عندهم جهد من غير أنهم يطلبو الله يعفو عليك. ويجي دك الظيف الكبير ، لي سنيها سنين طويلة وعمرو جا ، و لي غايبدل من حالك ومن حال ولادك ، حيت كاع هاد الضيوف مجرد ضيوف اشباح يجيو ليوم وينساوك البارح 
أي تشابه في الأحداث أو الشخصيات فهو من محض الصدفة، وأي تشابه مع الواقع فهو غير مقصود 
ربہأطہيہ أسہ أشہ ·ناشط فسبوكي
